Me dhimbje të thellë e morëm lajmin për vdekjen e kolosit të letrave shqipe, shkrimtarit të mirënjohur mbarëkombëtar, Ismail Kadare.
Krijimtaria letrare e Ismail Kadaresë, e shprehur përmes një talenti të jashtëzakonshëm dhe të veçantë, është pasuri letrare që i takon mbarë kombit shqiptar dhe më gjerë.
Vepra e Kadaresë ka qenë e pranishme në Kosovë dhe është bërë pjesë e pandashme e adhuruesve të veprave të mirëfillta të artit, është lexuar, është shkruar dhe është folur për të, është studiuar dhe do të vazhdojë të mbetet e tillë edhe në të ardhmen.
Ismail Kadare është shkrimtari më i njohur shqiptar dhe autor i përkthyer në rreth 45 gjuhë të botës, shpeshherë i krahasuar me autorë të përmasave botërore. Fitues i çmimit botëror për letërsinë “Man Booker International” më 2005, çmimit “Princ i Asturias” për Artet më 2009 dhe çmimit “Jeruzalem” më 2015 dhe disa herë kandidat për çmimin Nobel në Letërsi.
Kadare lindi në Gjirokastër, ishte akademik, politikan, ish-deputet i Kuvendit Popullor, zv/kryetar i Frontit Demokratik dhe një ndër shkrimtarët më të mëdhenj bashkëkohorë, i shquar për prozë, dramaturgji, poezi dhe përkthime.
Ngushëllime të sinqerta familjes dhe gjithë komunitetit artistik!
Pushoftë në paqen e përjetësisë!